SÜDƏMƏR YAŞLI UŞAQLARDA PNEVMONİYALAR ZAMANI PRESEPSİNİN İNFORMATİVLİYİ

Annotasiya

Pnevmoniyalar- etiologiyasına, patogenezinə, morfoloji xarakteristikasına görə kəskin infeksion xəstəliklər qrupu olub, ağciyərlərin respirator şöbələrinin ocaqlı zədələnməsi ilə xarakterizə olunur. Son dövrlərdə pnevmoniyaların diaqnostika və gedişində iltihab markerləri və sitokinlərin təyini əsas rol oynayır. Bunlardan daha əhəmiyyətlisi presepsin hesab edilir. İşin məqsədi: südəmər yaşlı uşaqlarda pnevmoniyalar zamanı qan zərdabında presepsinin klinik-diaqnostik əhəmiyyətini qiymətləndirməkdən ibarətdir. Müayinələr nəticəsində aşkar edilmişdir ki, pnevmoniya olan xəstələrdə presepsinin səviyyəsi nəzarət qrupu ilə müqayisədə artaraq I qrupda 1470,9±119,5 (min 795,2 pq/ml; max 2857 pq/ml) 4,2 dəfə, II qrupda isə 1044,3±67,3 (min 571,5 pq/ml; max 1943,1 pq/ml) təşkil etmişdir. Qruplar arasında müqayisə apardıqda daha çox I qrupda artma müşahidə olunmuşdur. Müəyyən edilmişdir ki, presepsinin səviyyəsinin əhəmiyyətli dərəcədə artması xəstələrdə pnevmoniyanın gedişi ilə mütənasibdir.